୧୯୪୭




ଅଗଷ୍ଟ ପନ୍ଦର ଆଜି-

ପାଦେ ଏ ଯେ ସ୍ପର୍ଶ ଲାଗେ ଅଭିନବ-ନୂତନ ସୋପାନ।

ଏହା ତଳେ ରହିଗଲା ଇତିହାସ-ଦୀର୍ଘ ଅଭିଯାନ…

ରହିଗଲା-

ତିନି ଶହ ବର୍ଷ ବ୍ୟାପୀ ମଣିଷର ଲହୁ ଆଉ ଲୁହ

ସତ୍ୟାଗ୍ରହ ମୁକ୍ତିକାମୀ ଜନତାର ଆଗ୍ନେୟ ବିଦ୍ରୋହ।

ରହିଗଲା-

ବିଲାତର ପ୍ରାଣହୀନ ପୁଞ୍ଜିପତି ଲୁବ୍‌ଧକ କୌଶଳ…

ଉତ୍ତମାଶା ଅନ୍ତରୀପ… ପଣ୍ୟପୋତ… କମ୍ପାନୀ ଅମଳ…

କ୍ଲାଇବ୍‌ର କୂଟନୀତି-ବଣିକର ସୁନେଲୀ ଚକ୍ରାନ୍ତ…

ମିର୍କାସିମ୍‌… ପାନିପଥ…ହେ ନବାବ, ହେ ଶିଖ ଦୁର୍ଦ୍ଦାନ୍ତ

ବାହଶାହା ଓ ପେଶବା। କର ସନ୍ଧି, ନତକର ଶିର,

ଅର୍ଘ୍ୟ ଦିଅ ସିଂହାସନେ ଭାରତର ମାଂସ ଓ ରୁଧିର।

ରହିଗଲା-ପଦଲେହୀ କୁକୁରର ଜମିଦାର ପଦରେ ଲାଳସା,

ନାଲିସ୍‌…କ୍ରୋକି… ନିଲାମ ଚକ୍ରବୃଦ୍ଧି କ୍ରମେ ସୁଧକଷା

ଦୁର୍ଭିକ୍ଷ ଓ ଅନଟନ… ମହାମାରୀ… ଅନ୍ଧାର ଅନ୍ଧାର,

କଙ୍କାଳ,କାଙ୍ଗାଳ ଆର୍ତ୍ତ କୋଟି କୋଟି କଣ୍ଠେ ହାହାକାର।

ଅସହାୟେ ଗ୍ରାମବାସୀ କାନ୍ଦେ ଯେବେ, ଯେବେ ଛାଡ଼େ ରଡ଼ି

ତା ଲାଗି ସଜିଲ ଥିଲା ଲାଲ ଆଖି, ନାଲିଆ ପଗଡ଼ି।

ହେ ଲାଟ, ହେ ଜଙ୍ଘିଲାଟ, ହେ ସାହେବ, ହାକିମ ଓ ବାବୁ।

ୟାକୁ କି ଶାସନ କହି? ମଣିଷକୁ କରିବାକୁ କାବୁ 

ଯେତେ ନାଗଫାଶ!

ସୁନାର ଏ ଦେଶ ହେଲା ଛାରଖାର, ହେଲା ସର୍ବନାଶ!

ସର୍ବହରା ଆମେ ସର୍ବେ-ଲୁଟିଛି ତ ଧନ ମାନ ଶ୍ରମ-

ଜୀବନେ ସମ୍ବଳ ମାତ୍ର-ପ୍ରିୟ ଅତି-ବିଶ୍ବାସର ଧର୍ମ।

ସକଳ ଦେଇଛୁଁ ବଳି, ଧର୍ମେ କିନ୍ତୁ କରିବୁନି ତ୍ୟାଗ-;

ହେ ସିପାହୀ… ଧର୍ମ୍ମରଣେ ଉଠ ମାତି, ଜାଗ ବୀର ଜାଗ!

ରହିଗଲା-

କେତେ ଗୁଳି, ବର୍ଚ୍ଛାମୁନ, ଲାଠିମାଡ଼, ହତ୍ୟା ଆଉ ଫାଶୀ,

ଥାନା ଜେଲ୍‌… ଦେଶାନ୍ତର, ଅର୍ଡ଼ିନାନ୍‌ସ, ବାଆ ଓ ବତାସୀ,

ରଖିଗଲା ଦାଗ…

ଚୌରିଚୌରା ଓ ଇଞ୍ଚୁଡ଼ି, ଦାଣ୍ଡିଯାତ୍ରା, ଜାଲିଆନାବାଗ।

ଜନତାର ଯାତ୍ରାପଥେ ବିଜୟର ବରମାଲ୍ୟ ତାହା-

ମୁକ୍ତିର ମଶାଲ ଜାଳି ତେଜିଉଠେ ଗାଆଁ ପରେ ଗାଆଁ

କଙ୍କାଳ କରିଛି ଦାବି, ବଂଚିବାର ନ୍ୟାଯ୍ୟ ଅଧିକାର…

ଆମରକ୍ତେ କେତେ କାଳ ରଞ୍ଜା ହେବ ତୁଚ୍ଛ ଦରବାର?

ଚଉପାଶେ ଆଇନର ଜାଲଛନ୍ଦା ଦାସତ୍ବ ଶୃଙ୍ଖଳ…

ଅମଙ୍ଗଳ ଏ ଶାସନ ଚାଲୁ ରଖେ ଶୋଷଣ କଳ।

ଏହା ସାଥେ ନାହିଁ ସହଯୋଗ-

ଏକଜୁଟ ହୁଅ ଭାଇ ଭାରତର ତ୍ରିଂଶକୋଟି ଲୋକ!!

ତ୍ରିଂଶକୋଟି ଭାରତୀୟ ଅନ୍ନହୀନ ସର୍ବହରା ଭାଇ,

କାଙ୍ଗାଳ ହୋଇଛି ଦେଶ-; ମୁଠେ ଲୁଣ ବଂଚିବାର ପାଇଁ

ଚାହୁଁ ଆମେ! ପ୍ରାଣ ଥାଉଁ ଖୋଲିବୁନି ଏ ମୁଠାର ଜାବ!

ବନ୍ଧୁକ ଆବାଜ୍‌ ଆଗେ ବକ୍ଷ ଖୋଲି ଦିଅଇ ଜବାବ

ଭାରତର ମୁକ୍ତି ସେନା-ସତ୍ୟାଗ୍ରହୀ-ତିଳେ ନାହିଁ ଭୟ;

ଉଲ୍ଲଙ୍ଗ ଫକୀର ଜଣେ ଆଗେ ଚାଲେ। ‘ଜୟ ଜୟ ଗାନ୍ଧିଜୀର ଜୟ”।

 

 

 *         *      *




+ -

© Jataayu Charitable Trust
Site designed,developed & maintained by Tekons