ରାସ୍ତାରେ ରାସ୍ତାରେ ମର୍କରୀଲାଇଟ୍ ପଲଟନ:
-ସେମାନେ ପାଳୁଛନ୍ତି
ଅନ୍ଧାରକୁ କବର ଦେବାର ମହୋତ୍ସବ।
କାନ୍ଥରେ କାନ୍ଥରେ ଆଲୋକର ଆତସବାଜୀ,
ପ୍ରତି ପ୍ରକୋଷ୍ଠ ଧପ୍ ଧପ୍ କରି ଉଠୁଛି
ସଭ୍ୟତାର ବିଜୟୋଲ୍ଲାସରେ।
…ଜହ୍ନ ଯାଇଛି ହଜି;
…ଜ୍ୟୋତ୍ସ୍ନା ଯାଇଛି ଲିଭି।
ଜେଟ୍ ବିମାନରେ ଘୁମୁରାରେ ଆକାଶ ଆଚ୍ଛନ୍ନ
କାରଖାନାର ହୁଟୁ ହୁଟୁ ଶବ୍ଦ
ବାୟୁମଣ୍ଡଳରେ ଖେଳାଇ ଦେଇଛି କର୍ମତତ୍ପରତା;
ତାଳ ମିଳାଇ ଏକମୁଖୀ ସଂଖ୍ୟାହୀନ ପାଦ ଧାବମାନ।
ନଗରକୁ ପ୍ଲାବି
ବିସ୍ତାରିତ ଯାଇଛି ଦୁରନ୍ତ ପଲ୍ଲୀକୁ-
ଶ୍ରେଷ୍ଠ ଗାୟିକାର କଣ୍ଠେ ମତାଣିଆ ଆମନ୍ତ୍ରଣ
ପରଦେଶୀ ପଥଚାରୀକୁ ଇଙ୍ଗିତ ଦିଏ
ମୋଗଲୀ ପରିବେଶରେ ସଜ୍ଜିତ ଷ୍ଟଲ୍ରେ
ନିଜକୁ ହଜାଇ ଦେବା ଲାଗି।
ହୋଟଲର ପ୍ରତିଟି କୋଠରୀ
ଗୁଞ୍ଜରି ଉଠିଛି ପରୀପୁରୀ ସଂଗୀତ ମୂର୍ଚ୍ଛନାରେ।
…କାକଳୀ ହୋଇଛି ସ୍ତବ୍ଧ;
…ନିଶବ୍ଦ ହାହାକାର
ଚିତ୍କାର କରୁଛି
ଶୂନ୍ୟତାର ପ୍ରାଣକେନ୍ଦ୍ରରୁ।
ଯୋଜନାର ନଗରୀ ୟେ ନଗରୀରେ ନଂ ୧;
୨୮୯ ଅଟ୍ଟାଳିକା, ପ୍ରତିଟି ୨୨ ତାଲା,
ପ୍ରତିଟି ତାଲାରେ ୧୩୫ ସୁଟ,
ସବୁଥିରେ ମଡର୍ଣ୍ଣ ସରଞ୍ଜାମ୍;
ଲନ୍, ସ୍ବିମିଙ୍ଗପୁଲ, ପାର୍କ, ଷ୍ଟାଡିଅମ୍,
କିଣ୍ଡରଗାର୍ଟନ, ସ୍କୁଲ, କଲେଜ, ୟୁନିଭର୍ସିଟି,
ନର୍ସରୀ, ଡାକ୍ତରଖାନା, ଲାଇବ୍ରେରୀ, ମ୍ୟୁଜିୟମ୍;
କିଛି ପଡି ନାହିଁ ବାଦ।
ସଭିଙ୍କ ଲାଗି କର୍ମସଂସ୍ଥାନ, ନିରାପତ୍ତା ବ୍ୟବସ୍ଥା;
ଜନ୍ମଠାରୁ ଶବାଧାର ସବୁ ନିୟନ୍ତ୍ରିତ;
ସମୃଦ୍ଧିର ମାଷ୍ଟର ପ୍ଲାନ
ନିର୍ଭୁଲ କମ୍ପ୍ୟୁଟର ଭଳି।
ପ୍ରାଣ ଯାଇଛି ଶୁଖି;
ମୁଁ ଯାଇଛି ମରି।