ପବିତ୍ର ମୋ ସମ୍ବିଧାନ, ପବିତ୍ର ତ ଭୋଟ;
ସତ୍ୟ, ନ୍ୟାୟ, ଗଣତନ୍ତ୍ର ଲାଗି ପାସ୍ପୋର୍ଟ।
ସାର୍ବଭୌମ ପାର୍ଲାମେଣ୍ଟ, ମନ୍ତ୍ରିତ୍ବ ଜାହିର;
କଳିଯୁଗେ ରାମ ରାଜ୍ୟ ନୌକାରସାହିର।
ଗନ୍ଧମାର୍ଦ୍ଦନ ଥାପିଲା ପ୍ରାୟ ହନୁମାନ
ଆମ୍ବେଦକର ରୋପିଲେ ଆମ ସମ୍ବିଧାନ
ବ୍ରିଟେନର ବୀଜ ଆଉ ଆମେରିକା ସାର,
ତହିଁରୁ ଫୁଟିଲା ଛତୁ ମୌଳିକାଧିକାର।
ଆମ୍ବେଦକର ଯେ ଜାଣ ମନୁ କଳିକାଳେ;
ଆଧୁନିକ ଶାସ୍ତ୍ରକାର ବିଧାନବିଦ୍ୟାରେ;
ସୃଷ୍ଟିକଲେ ବ୍ରହ୍ମାଣ୍ଡ ସେ ଏ ଯୁଗର ବ୍ରହ୍ମା,
ଖଣ୍ଡ ଖଣ୍ଡ ହେଲା ଅଣ୍ଡା ନ ଧରେ ଉଷୁମା।
ଖଣ୍ଡିତ ଭାରତବର୍ଷେ ପଣ୍ଡିତ ନେହେରୁ
ବିଶ୍ବାମିତ୍ର ସୃଜିଲେ ଯେ ଧର୍ମଛଡା ତରୁ
ବିଂଶ ବର୍ଷେ ହେଲା ତା’ର ତ୍ରିଂଶ ସଂଶୋଧନ,
ମୌଳିକ ଯେ ଅଧିକାର ମୂଳରୁ ଛେଦନ।
ଏ ବୃକ୍ଷର ପତ୍ରେ ପତ୍ରେ ତକ୍ଷକର ବାସ
କଷି ଧରି ଅପର୍ଯ୍ୟାପ୍ତ, ଫଳେ ସର୍ବନାଶ;
ଡାଳେ ଡାଳେ ଲୋଟିଯାଏ ଯୋଜନା –କଳିକା;
ଫିଟିଲେ ଫାଟିଲେ ଜାଣ ବେଲୁନ୍ ଭଳିକା।
ସଂଜୀବିତ ରାମରାଜ୍ୟେ ଶୁଦ୍ଧ ଗଣତନ୍ତ୍ର
ଦାରିଦ୍ର୍ୟ କବଚେ ଲେଖା ସାମ୍ୟବାଦ ମନ୍ତ୍ର,
ନିରାପତ୍ତା ଦାୟେ ଚାଲେ ଆଶ୍ରିବା ଗାରଦ
ନମୋ ନମୋ ଦାରୁଭୂତ ଇଣ୍ଡିଆ ଭାରତ।